Humlevik bru og Humlevikselva

Humlevikselva har sitt utspring, eller meir presist sine utspring høgt til fjells. Det eine på Prestasætre der Grindelva renn ned mot myrane og vert kalla Løkjen videre og renn mot Myrdal. Her renn elva frå Myrdalsvatnet og elva frå Buskaret (Steinelva) saman med Løkjen og dannar Humlevikselva. Elva frå Myrdalsvatnet har vore drivkraft til 2 kvernhus, der kvenkallen har drive slipestein, og gjennom eit blokk og tausystemblei nytta til pløying av åker for ein av gardane i Myrdal. 

Då dei bygde røyrbrua i Humlevikslva var ein avhengig av låg vasstand, og tilpassa det med lita elv for å få gjort arbeidet. Brått registrerte ein at vatnet auka monaleg, men formannen viste råd. Han heiv seg i bilen til Myrdal der dei dreiv med aktivitet som trong vatn på kvernkallen. Dei (bruk 2) hadde då opna ei stemme i Myrdalsvatnet for å få nok vatn til å slipa ljåen. Ved å stengja stemma sokk vasstanden hurtig att. Dette slipeutstyret stod nede der elva svinger NV, midt mellom huset og brua til bruk 2. Her var vel og nederste kverna.

Rett overfor det fyrste fossefallet, Jerikefossen, er det restar av ei stampe som stod der. Stampa vart driven av ein som budde på bruk nr 1 i Myrdal (Johannes Nilsson Reigstad, 1835-1915). Han kom opprinneleg frå Samnanger og vart kalla "Samningen",og hadde nok med seg "stampeideen" derfrå. Truleg var stampa i drift på slutten av 1800 / beg.1900. Kor stor produksjon/stamping av vadmel det var er ikkje godt å sei, stampa låg jo litt "usentralt" til, men det er vel grunn til å tru at det føregjekk ein del "leigestamping". Ut frå Tysnessoga ser det ut til at det har vore ein del produksjon av vadmel i Myrdal, kanskje dette kan ha vore attåtnæring til ei sikkert skrinn gardsdrift. 

Ca 500 meter lenger nede kjem det til ei ny elv, som kjem ned Sandalen. Også denne vert kalla Løkjen. Så vidt ein veit har det ikkje vore nokon aktivitet langs denne elva. Løkjen vart senka i samband med grøfting på Hagane midt på 1950 talet. Seinare vart det dyrka lenger oppe langs elva (Stokkamyra) og også der vart elva senka. Denne elva har sitt utspring m.a. frå Svartavatnet som ligg eit stykke opp i Sandalen (på austsida).

Det neste som kjem, er brua over elva mellom Hagareset og Hagen, ein veg folk frå Hagen og Myrdal nytta før Myrdalsvegen kom, men og til kommunikasjon mellom Hagestad/Hagareset og Hagen. Her er det framleis bru.

Noko lenger nede, på vestsida, er det murer etter noko. Dette er på 108/10 (Rosvold). Her ligg og noko gamalt bølgeblekk, men det er uvisst kva som har vore der. Eit stykke lenger nede, ca 50 m overfor Humleviksbrua (1903) kan gardane på Belt hatt kvernhus, etter gamle utsegn. Det er ikkje mogeleg å finna spor etter dette, og elva har lite fall, så denne plasseringa er noko usikker, om det i det heile har vore noko der.

Neste minnesmerke er sjølvaste Humleviksbrua, ei bogebru og vakkert kulturminne. 

Ca. 100 meter lenger ned ligg restane av ei eldre bru, som vart nytta før 1903. Det neste som kjem, er restane av inntaksdammen for eit kraftverk Lavikane bygde på 1930 talet. Denne demninga vart kun bygd til midt i elva grunna usemje mellom to av gardane. Dette reduserte effekten av kraftverket. Dette kraftverket, som truleg fyrst var i Uggdal, leverte kraft til dei omliggjande gardane til fram på 1950 talet då Tysnes Kraftlag kom på banen. Ein stor stein som ligg oppå denne muren, viser kva krefter som er i elva.

I "nyare tid" vart det støypt ein betongkumme som var inntakskum for vatn til drivhuset nede med Beltasjøen. Dette er rett aust for demningen til kraftstasjonen. Denne svingen i elva er vorten mykje større etter at uttaket i demningen tetta seg og er no vorte ei "øy" i elva. Dette er det einaste spor etter aktivitet langs elva relatert til denne garden (109/3).

Til slutt renn elva ut i Humlevika gjennom eit lite «delta».